DTV Toffen

 

Jahresbericht 2014

Üsäs Vereinsjahr het Mitti März mitäm Schiiweekend in Meiringä-Haslibärg gstartät. A däm Wuchenänd isch o wieder ds Teamrace gsi, das mau aber ohni Mannschaft vom DTV. Wahrschinläch het üs einisch glängt J Nachäm Team Race hei mir äs feins Apéro gnossä und nähr ds Fürwärk bestunt. Am Abä hei säch no äs paari ids Dorf gwagt, viu si aber grad ir Ungerkunft bliebä und hei dert no zämä brichtät und glachät. Am Sunntig ischs de so richtig sunnig gsi, drum isch mä vor auäm no am Vormittag gfahrä und nähr hei mir di warmä Sunnästrahlä im Après-Ski gnossä.

Im Trainingslager ds Burgdorf ischs de nüt gsi mit gmüetlechem Apero und Sunne gniesse, schliesslech hei mir üs guet wöue uf d Wettkämpf vorbereite. Mir hei am Samsti und Sunti flissig trainiert und hei so i aune Diszipline chönne Fortschritte mache. U nachem Trainingslager si mir de so richtig id Wettkampfvorbereitig gstartet. Jede Donsti und Friti hei mir ds Beschte gä und o am 17.Mai hei mir no mau ä ganze Tag ids Trainings investiert.

Am 29. Mai het üs d’Turnfahrt nach Urtänä gfüehrt und nach dr Predigt si mir zrügg uf Toffä zum Sportplatz. Wius aber het afa rägnä, hei mir nähr bir Familie Pulfer Ungerschlupf gfungä und dert chönnä brätlä.

U de si mir mit grosse Schritte uf ds Mittelländische Turnfescht Toffe zuegange, üses Heimspiel. Trotz em grosse Hälferisatz vo üsne Turnerinne, si o di sportleche Leistige nid ds churz cho. Gross isch d Fröid gsi vorem heimische Publikum ufdsträte und di einti oder angeri isch sicher über sich usegwachse bi so viel Unterstützig. Drum möchti nomal di guete Resultat ufzeue, wo mir a üsem Turnfescht erreicht hei:

Im 3-teilige Vereinsvettkampf ir 1. Stärkeklass hei mir dr 4. Platz erreicht mit 26.48 Punkt. I dä einzelne Diszipline hei mir folgendi Note erzielt:

KUG: 9.39 (5) BA: 8.60 (13) GK: 8.45 (17)

WE: 9.05 (5) STH: 9.14 (10) FTA: 9.18 (15)

SB: 8.59 (6) PS80: 8.90 (12) TAE: 8.55 (13)

Mit dr Gymnastik hei mir im eiteilige Vereinswettkampf dr 2. Platz erreicht und das mit dr Note 8.94.

O d Einzelturnerinne und Turner si erfolgrich gsi:

1. Rang Leichtathletik weibliche Jugend: Stefanie Bütler

12. Rang Leichtathletik Vierkampf: Fabienne Bugnon

U d Manne hei de ono 4 Medaille und 2 Diplom gholt.

Mir chöi also uf nes erfolgrichs Heimturnfescht zrügluege, wo aui viel gschaffet hei, us Hälfer aber o us sportlecher Sicht, merci öich aune für dä rise Isatz wo dir gleistet heit.

O sitens OK söu a derä Steu no mau härzläch dankt wärdä. Für üsäs Heimturnfescht isch jahrelang intensiv gschaffät wordä und dir aui heit drzue bitreit, dass mir ä Alass hei chönnä organisierä, wo id Toffner Dorfgschicht igeit. Numä dür öppis isch üsäs Turnfescht überschattät wordä: Leider hei mir im März 2014 dr OK-Vizepräsidänt dür Härzversägä verlorä. Äs isch für üs aui trurig gsi, dass mir mitäm Peter Bigler ä jahrelangä Turnkolleg verlorä hei und är ds Turnfescht ds Toffä nüm het dörfä erläbä. Mir wärdä ihn im Aschluss a dä Bricht mitärä Schwiegäminutä ehrä.

Nach üsem Turnfescht si gloub aui chli müed gsi, aber glich hei mir üsi Energiereservä azapft u si ä Wuche speter am Verbandsturnfescht ds Roggwil gstartet. Ds Wätter dert isch also de lengstens nid so guet gsi wi ds Toffen. U de hei mir ono chli früeh müesse afa, am 8ti am Morge Grät turne fägt eifach scho nid so. Mir hei aber ds beschte drus gmacht und folgendi Resultat erzielt:

Im 3-teilige Vereinsvettkampf ir 2. Stärkeklass hei mir dr 7. Platz erreicht mit 26.36 Punkt. I dä einzelne Diszipline hei mir folgendi Note erzielt:

KUG: 8.92 (5) BA: 8.20 (12) GKBOSSB: 8.25 (17)

WE: 8.86 (5) STH: 9.00 (7) FTA: 9.58 (17)

SB: 8.78 (6) PS80: 8.70 (12) TAE: 8.68 (13)

Und mit dr Gymnastik si mir im eiteilige Vereinswettkampf ufem 3.Platz glandet und das mit dr Note 8.62.

De hei mir natürlech o Kampfrichterinne müesse steue, ohni die chöi mir nämlech nid a dä Turnfescht starte. D Flavia Ryf und Jasmin Anderegg si für üs ga FTA Schiedsrichtere. Merci öich beidne.

Nach dere asträngende Wettkampfsaison hei sech sicher aui uf d Summerpouse gfröit u die o richtig verdient.

2014 het ds Toffä wiederum ä Bundesfiir stattgfungä. O üsä Verein isch dert veträtä gsi. Einägi aus Zueschouer und zwöi vo üs aus Häuferinnä, nämläch d’Jasmin Anderegg und d’Flavia Ryf.

Am 6. Septämber hei mir am Toffä-Märit wieder äs Beizli gfühert. Üsi Pizza’s si o i däm Jahr grüehmt wordä und mir hei üs vor auäm am Abä über viu Gescht dörfä fröiä. Sitens DTV si im OK d’Karin Hänni, d’Anita Reber und d’Nathalie Grob verträtä gsi.

Am gliche Tag het o dr Westamtturntag ds Wattenwil statt gfunde. Vom DTV isch dert d Stefanie Bütler gstartet u het dr 3. Rang erreicht.

Numä ei Wuchä später, am 13. Septämber, het d’Summerolympiadä stattgfundä, wo rekordverdächtägi 181 Personä dran teilgno hei. Erschtmaus ischs o am Abä sportläch wytergangä, äs het nämläch im Aschluss ad Olympiadä ä Sportnacht gäh. Di isch uf grossäs Interässä gstossä, äs hei säch 12 Teams agmäudät und bis spät id Nacht Volley und Unihockey gspielt. Vo üsärä Sitä si d’Nicole Steiner, d’Blanca Hodel und d’Julia Neuenschwander im OK gsi. Katja Kilchhofer und d’Barbara Schmid hei Tombola organisiert und d’Stefanie Bütler het säch um ds Salatbuffet kümmärät und d’Noémie Portmann het drfür gsorgt, dass Teilnähmer vor Sportnacht o guet si verpflegt wordä.

De chöme mir scho zum letschte sportleche Alass im 2014, ds Volleydorfturnier. Ds erste Mal hei mir 2 Teams vom DTV chönne stelle. Leider hets de nid ganz füre glängt, ds DTV Team 2 isch ufem 3. Rang und ds DTV Team 1 ufem 4. Rang glandet.

Am 13. Dezämber het ds Thun Rock the party stattgfungä. Das Fescht wird nid vo üs organisiert aber mir dörfä üs dert um d’Garderobä kümmärä und d’Inahmä i üsi Vereinskassä la fliessä. Aus Garderobierä hei säch d’Sarah Bütler, ds Conny Gasparini und d’Jasmin Rentsch zur Verfüegig gsteut.

Traditionsgemäss hei mir üsäs Vereinsjahr mitäm Wiehnachtshöck beändät. Dä het am 18. Dezämber im Bärä stattgfungä und isch vor Mirjam Uhde organisiert wordä. Si het das ganz originell gmacht und mitäm Blei giessä het mä sogar ä Blick i Zuekunft chönnä wagä.

Mir hei viel erläbt i däm 2014 u i dänke ds Mittelländische Turnfescht Toffen wird üs no lang i Erinnerig blibe. I danke aune Leiterinne für ihre gross Isatz u hoffe, dass mir o im 2015 wider gueti sportlichi Leistige chöi zeige.

Öii Houptleiterin

Fabienne Bugnon

Natürläch hani dr letscht Jahresbricht fürä gno, bevor ig dä hie gschriebä ha. Und da bini scho chli wehmüetig wordä. I mim letschtä Absatz hani nämläch euphorisch gschriebä, dass ig mi uf auäs fröiä, wo ds Jahr 2014 mit säch bringt. Aber zum Glück weiss mä ja aubä nid, was eim erwartät. Das wüssä mir o für 2015 nid. Ig wünschä mir äs erfolgrichs Vereinsjahr, sowohl im sportlächä wie o im zwüschämönschlächä Berich.

Öii Presidäntin

Anita Bigler