DTV Toffen

 

Jahresbericht 2015

Üsäs Vereinsjahr het Mitti März mitäm Schiiweekend in Meiringä-Haslibärg gstartät. Äs isch zwar ä chlini Gruppä gsi, aber di hets so richtig gnossä, was dr Sandro Lüthi da wieder organisiert het.

 

Im April hei mir üs im Trainingsweekend ds Burgdorf uf di kommende Wettkämpf vorbereitet. 2 Täg lang hei mir a üsne Wettkampfprogramm gfielet und üsi Leistige i dä mässbare Diszipline verbesseret. Aber o dr Spass het nid dörfe ds churz cho, sigs am Friti Abe bim Spielturnier oder am Samsti Abe im Usgang.

 

Näbst üsne normale Donsti- u Friti-Trainings, hei mir am 9.Mai no ei Tag ids Training investiert, das mir mit üsne schetzbare Programm a dä Wettkämpf de o ä gueti Note erreiche. 

 

Am 14. Mai het üs d’Turnfahrt nach Kehrsatz gfüehrt und nach dr Predigt si mir zrügg uf Toffä zum Brätlä und gmüetlächä Zämäsi ufäm Spielplatz.

 

Üses erste Turnfescht i däm Jahr isch ds Seeländische ds Büren a dr Aare gsi, u d Aare hei mir de nachem Wettkampf o grad zum dusche brucht, da d Duschine chli wit wäg vom Feschtgländ si gsi.

 

Im 1-teilige Vereinswettkampf si mir mit dr Grossfäld Gymnastik und dr Note 8.69 ufem 2. Platz glandet.

 

Im 3-teilige Vereinswettkampf hei mir ä Gsamtpunktzahl vo 26.08 erreicht, das het füre 11.Rang ir erste Stärkeklass glängt. Folgendi Note hei mir i dä einzelne Diszipline erzielt:

 

1.WT: Kug (9.27), Stuba (8.85), Ba (8.78)

2.WT: Weit (8.84), STH (8.60), FTA (8.90)

3.WT: SB (7.70), Tae (7.78), PS (9.19)

 

O im Einzelwettkampf si d Toffner erfolgrich gsi:

 

D Stefanie Bütler het ir Kategorie LA weibliche Jugend ds oberste Stägli ufem Podest chönne bestige.

Und o dr Alex Bütler het im Berner Sechskampf mitem 23. Rang ä Uszeichnig gholt.

 

Ds mittelländische Turnfescht ds Frauenkappelen hei mir de chli entspannter chönne aga, aus ds Mittelländische vo letscht Jahr. I gloub aui heis gnosse, widr uf dr andere Site vom Fescht ds si.

 

Im 1-teilige Vereinswettkampf Gymnastik hei mir mit dr Note 8.90 dr 5.Rang erreicht.

 

Im 3-teilige Vereinswettkampf hei mir mit 26.97 knapp dr 9i Durchschnitt verpasst und si ufem 14. Rang glandet. Folgendi Note hei mir i dä einzelne Diszipline erzielt:

 

 

1.WT: Kug (9.83), Stuba (8.87), Ba (8.41)

2.WT: Weit (9.67), STH (9.50), FTA (9.10)

3.WT: SB (9.21), Tae (8.08), PS (9.31)

 

U de no zu dä Einzelturner:

 

D Stefanie Bütler het im LA 4-Kampf dr 5.Platz mit Uszeichnig erreicht.

 

Ändu Schläppi, 6.Rang Berner 6-Kampf, Uszeichnig.

Alex Bütler, 10.Rang Berner 6-Kampf, Uszeichnig.

Michael Beyeler, 14.Rang Turnwettkampf, Uszeichnig.

Fritz Pulfer, 2.Rang, Turnwettkampf Seniore.

 

Dir gset mir hei o im 2015 widr einiges erreicht a dä Wettkämpf, das wär nid möglech ohni di zahlriche Leiterinne, drum äs grosses Merci a öich. Und o d Kampfrichterinne möchti hie no churz erwähne, ohni die chönnte mir nämlech o nid a dä Wettkämpf teilnä. O öich merci für öiie Isatz.

 

Fürnä würdigä Abschluss het d’Marianne Matti gsorgt. Ds letschtä Training vor dä Summerferie hei mir nid ir Hauä, sondern bi ihrä daheim bimnä gmüetlächä Brätlä verbracht.

 

Während dä Summerferie si aber nid aui untätig gsi. Wiu mir bir Bundesfiir jewils zwöi Häuferinnä müessä steuä, si d’Flavia Ryf und ig dert no aktiv gsi.

 

Nach dä Summerferie ischs de schnäu gangä und d’Toffener Summerolympiadä isch scho vor dr Tür gstangä. Ar Olympiadä hei 117 Ching und 17 Familieteams teilgno. Aui Teilnähmer si vo dä Kampfrichter, dä Häuferinnä und Häufer vo dr Froue- und Manneriegä, instruiert und agführät wordä. Im OK het vo üsärä Sitä d’Julia Neuenschwander mitgwürkt. Katja Kilchhofer und d’Barbara Schmid hei Tombola organisiert und d’Stefanie Bütler het säch um ds Salatbuffet kümmärät.

 

Numä zwe Wuchä später het dr nächscht Alass stattgfungä. Am 5. Septämber hei mir am Toffä-Märit wieder äs Beizli gfühert. Leider hets am Märit und somit o bi üs im Beizli i däm Jahr nid so viu Lüt gha. Trotzdäm si üsi Pizza’s grüehmt wordä. OK-Präsidäntin vo däm Alass isch d’Karin Hänni gsi und für d’Pizzas het d’Anita Reber gsorgt.

 

Am Westamtturntag hei Bütlers Toffe verträte u das erfolgrich:

D Steffi het uf ds Podescht chönne ufestige, si het dr 3.Rang beleit und  dr Alex het mitem 4.Rang ds Podescht knapp verpasst.

 

Scho lang isch ds OK vor Turnvorstellig mit dä Vorbereitigä drannä gsi und im Novämber ischs äntläch sowyt gsi. Während vier Vorstelligä hei mir üs zum Thema „Villa Geistreich“ im Singsaal Toffe vo üsärä beschtä Sitä chönnä zeigä. D’Rückmäudigä vo Jung und Alt si sehr positiv gsi, mir dörfä üs auso uf d’Schultärä chlopfä und drbi ganz bsunders am OK unger dr Leitig vor Chantal Tanner dankä. Vom DTV si dert no d’Noémie Portmann und d’Nicole Leuenberger drbi gsi. Aber o ohni d’Leiterinnä wärs natürläch nid gangä. D’Fabienne Bugnon und d’Nicole Leuenberger hei mit üs ä Tanz igstudiert und d’Julia Neuenschwander und d’Nicole Steiner hei äs Grät-Nummero zämä gsteut. Ds gmischtä Nummero mitäm TV isch vor Blanca Hodel und Fabienne Bugnon gleität wordä. Und eifach aui Nummero hei uf dr Bühni super usgseh.

 

Dr sportlech Abschluss vom 2015 isch ds Volleydorfturnier gsi. Füre DTV ischs meh ume Plousch aus um ds gwinne gange, das isch o verständlech nach dene 2 asträngende Turnvorstelligswuchenändi vorhär.

 

Traditionsgemäss hei mir üsäs Vereinsjahr mitäm Wiehnachtshöck beändät. Dä het am 17. Dezämber im KIZE stattgfungä und isch vor Mirjam Uhde organisiert wordä. Bi derä Glägäheit hei mir no grad dr Pizzateig chönnä bruchä, wo vom Toffe-Märit übrig bliebä isch, ä sehr gueti und sehr feini Idee.

 

Zu gueter Letscht het am 19. Dezämber ds Thun no „Rock the party“ stattgfungä. Das Fescht wird nid vo üs organisiert aber mir dörfä üs dert um d’Garderobä kümmärä und d’Inahmä i üsi Vereinskassä la fliessä. Aus Garderobierä si d’Sarah Bütler, d’Steffi Bütler, d’Jasmin Rentsch und ig vor Ort gsi.  

 

Ds 2015 isch sportlech gse äs ganz normals Jahr gsi: keni Gross-Aläss, kes eigets Turnfest, so hei mir üs ganz uf üsi sportleche Leistige chönne konzentriere. Im 2016 erwartet üs de widr äs Kantonals Turnfescht, drum wünschi üs aune ä unfallfreii Vorbereitig und gueti turnerischi Leistige im 2016.

 

Öii Houptleiterin

Fabienne Bugnon   

 

 

Ig ha i däm Bricht wieder sehr viu Nämä vo öich dörfä nennä, nämläch überau wo dir ä Alass organisiert oder äs Ämtli überno heit. Wenn mir das nid uf üs aui chöntä verteilä, würd ä Verein nid funktionierä. Drum a derä Steu mi Dank a aui, wo säch 2015 fürä DTV igsetzt hei. Ig wünschä üs äs erfolgrichs und zfriednigs Turnerjahr 2016!

 

Öii Presidäntin

Anita Bigler